Home India കരിപ്പൂര്‍ വിമാനാപകടത്തില്‍ പൈലറ്റുമാരടക്കം16 മരണം; നിരവധി പേര്‍ ഗുരുതരാവസ്ഥയില്‍

കരിപ്പൂര്‍ വിമാനാപകടത്തില്‍ പൈലറ്റുമാരടക്കം16 മരണം; നിരവധി പേര്‍ ഗുരുതരാവസ്ഥയില്‍

743
0
flight crash karippoor death toll

കോഴിക്കോട്: നാടിനെ ഞെട്ടിച്ച കരിപ്പൂര്‍ വിമാനാപകടത്തില്‍ പൈലറ്റും സഹപൈലറ്റും അമ്മയും കുഞ്ഞും അടക്കം 16 പേര്‍ മരിച്ചതായി റിപ്പോര്‍ട്ട്. മരണസംഖ്യ ഉയരുമെന്നാണ് സൂചന. കോഴിക്കോട് മെഡിക്കല്‍ കോളജ്, കൊണ്ടോട്ടി റിലീഫ് ആശുപത്രി, കോഴിക്കോട് ബേബി മെമ്മോറിയല്‍ ആശുപത്രി, മിംസ് ആശുപത്രിയി എന്നിവിടങ്ങളിലാണ് മരണം. കോഴിക്കോട് മെഡിക്കല്‍ കോളജിവെച്ച് മരിച്ചവരില്‍ ഒരു അമ്മയും കുഞ്ഞുമുണ്ട്. വിമാനത്തിന്റെ പൈലറ്റ് ക്യാപ്റ്റന്‍ ദീപക് വസന്ത് സാത്തേ സാഠേ മരിച്ചതായി ആദ്യം തന്നെ റിപ്പോര്‍ട്ട് പുറത്ത് വന്നിരുന്നു. മരിച്ചവരില്‍ പലരെയും ഗുരുതരമായി പെരിക്കേറ്റ നിലയിലാണ് ആശുപത്രിയില്‍ എത്തിച്ചത്. 

കേരളത്തിന്റെ ചരിത്രത്തിലെ ആദ്യത്തെ വലിയ വിമാന ദുരന്തമാണിത്. ദുബൈയില്‍ നിന്നെത്തിയ എയര്‍ ഇന്ത്യ എക്‌സ്പ്രസ് വിമാനം ടേബിള്‍ ടോപ്പ് റണ്‍വേയില്‍ നിന്ന് തെന്നിമാറി 30 അടിയോളം താഴ്ചയിലേക്ക് പതിക്കുകയായിരുന്നു. വിമാനം രണ്ടായി പിളര്‍ന്നു. 123 പേര്‍ക്ക് പരുക്കേറ്റിട്ടുണ്ട്. ഇവരില്‍ 15ഓളം പേരുടെ നില ഗുരുതരമാണ്. വിമാനത്തിന് തീപിടിക്കാത്തതിനാല്‍ വന്‍ ദുരന്തം ഒഴിവായി.

ദുബൈ-കോഴിക്കോട് 1344 എയര്‍ ഇന്ത്യ എക്‌സ്പ്രസ് വിമാനമാണ് രാത്രി 7.41ഓടെ അപകടത്തില്‍ പെട്ടത്. ലാന്‍ഡിംഗ് നടത്തി റണ്‍വേയിലൂടെ ഓടിക്കൊണ്ടിരിക്കുന്നതിനിടെ വിമാനം തെന്നിമാറി താഴ്ചയിലേക്ക് പതിക്കുകയായിരുന്നു. കൊണ്ടോട്ടി കുന്നുംപുറം ഭാഗത്തേക്കാണ് വിമാനം പതിച്ചത്. വിമാനം മതിലില്‍ ഇടിച്ചു നില്‍ക്കുകയും രണ്ടായി പിളരുകയും ചെയ്തു. മുന്‍വാതിലിനും കോക്പിറ്റിനും ഇടയിലാണ് വിമാനം പിളര്‍ന്നത്. 174 യാത്രക്കാരും അഞ്ച് ജീവനക്കാരുമാണ് വിമാനത്തില്‍ ഉണ്ടായിരുന്നത്.

വിമാനാപകടത്തിനിടയാക്കിയത് കനത്ത മഴയെ തുടര്‍ന്ന് പൈലറ്റിന് റണ്‍വേയുടെ ദൃശ്യങ്ങള്‍ വ്യക്തമാവാത്തതു കൊണ്ടാണെന്ന് സൂചന. പ്രദേശത്ത് കനത്ത മഴ പെയ്യുന്നതിനിടെയായിരുന്നു അപകടം. വിമാനത്തിന് സാങ്കേതിക പ്രശ്‌നമൊന്നും ഉണ്ടായിരുന്നില്ലെന്നാണ് വിവരം. ലാന്‍ഡിംഗിനിടെ തെന്നിമാറി കൊണ്ടോട്ടികുന്നുംപുറം റോഡില്‍ മേലങ്ങാടി വഴിയുള്ള ക്രോസ് ബെല്‍റ്റ് റോഡിന്റെ ഭാഗത്തേക്ക് വീഴുകയായിരുന്നു. വന്ദേഭാരത് മിഷന്റെ ഭാഗമായി വന്ന വിമാനമാണിത്.

ഈ അപകടം പത്ത് വര്‍ഷം മുമ്പ് മംഗലാപുരത്തുണ്ടായ ദുരന്തത്തിന് സമാനം. എന്നാല്‍, കരിപ്പൂരില്‍ വിമാനത്തിന് തീപിടിച്ചില്ലെന്നതാണ് വ്യത്യാസം. അതിനാല്‍ത്തന്നെ ദുരന്തത്തിന്റെ ആഴം താരതമ്യേന കുറഞ്ഞു. കരിപ്പൂരിലുണ്ടായത് ക്രാഷ് ലാന്‍ഡിംഗ് ആണെന്നാണ് റിപ്പോര്‍ട്ട്. 2010 മെയ് 21ന് രാത്രിയായിരുന്നു മംഗലാപുരം വിമാനത്താവളത്തില്‍ അപകടമുണ്ടായത്. ജീവനക്കാരടക്കം 166 പേരുമായി ദുബൈ അന്താരാഷ്ട്ര വിമാനത്താവളത്തില്‍ നിന്ന് എത്തിയ എയര്‍ ഇന്ത്യ എക്‌സ്പ്രസ് 812 വിമാനത്തിന് ലാന്‍ഡിംഗിന് തൊട്ടുമുമ്പ് തീപ്പിടിക്കുകയായിരുന്നു. വിമാനം മംഗലാപുരം ബജ്‌പെ വിമാനത്താവളത്തില്‍ രാവിലെ ആറരയോടെ ലാന്‍ഡിംഗിന് ഒരുങ്ങുന്നതിനിടെയായിരുന്നു അപകടം.

വിമാനം റണ്‍വേയില്‍ നിന്നും തെന്നിമാറി മണല്‍തിട്ടയില്‍ ഇടിക്കുകയായിരുന്നു. തുടര്‍ന്ന് വിമാനത്തിന്റെ ചിറകുകള്‍ കോണ്‍ക്രീറ്റ് ടവറില്‍ ഇടിച്ചു. ഇടിയുടെ ആഘാതത്തില്‍ ഇന്ധനം ചോര്‍ന്ന് വിമാനം കത്തിയമരുകയായിരുന്നു. എട്ട് യാത്രക്കാര്‍ മാത്രം അത്ഭുതകരമായി രക്ഷപ്പെട്ടു. മരിച്ചവരില്‍ സ്ത്രീകളും കുട്ടികളും ഉള്‍പ്പെടുന്നു. ഇന്ത്യയില്‍ നടന്ന ഏറ്റവും വലിയ മൂന്നാമത്തെ വിമാന ദുരന്തമായിരുന്നു മംഗലാപുരത്തേത്. പല മൃതദേഹങ്ങളും കത്തിക്കരിഞ്ഞു പോയിരുന്നു. മൃതദേഹങ്ങള്‍ തിരിച്ചറിയാന്‍ സാധിക്കാത്തതിനാല്‍ ഒന്നിച്ച് സംസ്‌ക്കരിക്കുകയായിരുന്നു.

LEAVE A REPLY

Please enter your comment!
Please enter your name here