Home Headline സാമ്പത്തിക സംവരണം അട്ടിമറിക്കരുത്: മാര്‍ ആന്‍ഡ്രൂസ് താഴത്ത്

സാമ്പത്തിക സംവരണം അട്ടിമറിക്കരുത്: മാര്‍ ആന്‍ഡ്രൂസ് താഴത്ത്

116

കോട്ടയം: സാമ്പത്തിക സംവരണം അട്ടിമറിക്കരുതെന്നും സമുദായത്തിന്റെ ആവശ്യങ്ങള്‍ ഉന്നയിച്ചുകൊണ്ടുള്ള കത്തോലിക്കാ കോണ്‍ഗ്രസ്സ് സമരങ്ങള്‍ സര്‍ക്കാര്‍ ഗൗരവത്തോടെ പരിഗണിക്കണമെന്നും അല്ലാത്തപക്ഷം ക്രൈസ്തവസമൂഹം ഒറ്റക്കെട്ടായി പ്രശ്‌നപരിഹാരത്തിന് മറ്റുമാര്‍ഗ്ഗങ്ങള്‍ തേടുമെന്നും തൃശൂര്‍ ആര്‍ച്ചുബിഷപ്പ് മാര്‍ ആന്‍ഡ്രൂസ് താഴത്ത്. കത്തോലിക്കാ കോണ്‍ഗ്രസ്സ് ഗ്ലോബല്‍ പ്രസിഡന്റ് അഡ്വ. ബിജു പറയനിലത്തിന്റെ നേതൃത്വത്തില്‍ സാമ്പത്തിക സംവരണം പൂര്‍ണ്ണമായും നടപ്പിലാക്കണമെന്നാവശ്യപ്പെട്ടുകൊണ്ട് നടത്തിയ ഏകദിന ഉപവാസ സമരം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. കേന്ദ്രസര്‍ക്കാര്‍ അനുവദിച്ചിട്ടുള്ള സാമ്പത്തികമായി പിന്നോക്കം നില്‍ക്കുന്ന മുന്നോക്ക വിഭാഗക്കാര്‍ക്കുള്ള പത്തുശതമാനം സംവരണം പൂര്‍ണ്ണമായും നിബന്ധനകള്‍ കൂടാതെ നടപ്പിലാക്കണമെന്ന് ആര്‍ച്ചുബിഷപ്പ് ആവശ്യപ്പെട്ടു. കോവിഡിന്റെ പ്രത്യാഘാതത്താല്‍ ജനങ്ങള്‍ കടുത്ത സാമ്പത്തിക പ്രതിസന്ധിയിലായിരിക്കുന്നു എന്നുള്ള വസ്തുതയ്ക്ക് മുന്‍തൂക്കം നല്‍കി സര്‍ക്കാര്‍ കൂടുതല്‍ ജനോപകാരപ്രദമാകണമെന്നും ആര്‍ച്ചുബിഷപ്പ് ആവശ്യപ്പെട്ടു.

കത്തോലിക്കാ കോണ്‍ഗ്രസ്സ് ഉയര്‍ത്തുന്ന സമുദായ പ്രശ്‌നങ്ങള്‍ നിലനില്‍പിന് അനിവാര്യമാണെന്ന് കോട്ടയം അതിരൂപതാ വികാരി ജനറാള്‍ ഫാ. മൈക്കിള്‍ വെട്ടിക്കാട്ട് പറഞ്ഞു. തുടര്‍ന്ന് സമരത്തിന് നേതൃത്വം നല്‍കുന്ന അഡ്വ. ബിജു പറയനിലത്തിനെ അദ്ദേഹം ഷാള്‍ അണിയിച്ചു. ഗ്ലോബല്‍ ഭാരവാഹികളായ സാജു അലക്‌സ്, തോമസ് പീടികയില്‍, പ്രൊഫ. ജാന്‍സണ്‍ ജോസഫ്, ബെന്നി ആന്റണി എന്നിവര്‍ ഉപവാസം അനുഷ്ഠിച്ചു. സമരത്തിനു പിന്തുണ നല്‍കി ജനറല്‍ സെക്രട്ടറി ടോണി പുഞ്ചകുന്നേല്‍, പി.ജെ. പാപ്പച്ചന്‍, ഫാ. മനോജ് പാലക്കുടി, വര്‍ഗീസ് കായ്രൂക്കര രൂപത പ്രസിഡന്റുമാരായ ദേവസ്യ കൊങ്ങോല, ബിജു കുണ്ടുകുളം, വര്‍ഗീസ് ആന്റണി, രാജീവ് കൊച്ചുപറമ്പില്‍, തോമസ് ആന്റണി, ജോമി കൊച്ചുപറമ്പില്‍, ഭാരവാഹികളായ ബിനോയി ഇടയാടിയില്‍, ബേബി മുളവേലിപ്പുറം, രാജേഷ് ജോണ്‍, തങ്കച്ചന്‍ പൊന്മാങ്കല്‍, ജെയിംസ് പെരുമാംകുന്നേല്‍, ജോയ് കെ മാത്യു, ജോണ്‍ മുണ്ടന്‍കാവില്‍ എന്നിവര്‍ പ്രസംഗിച്ചു. ഉപവാസ ധര്‍ണ്ണ സമാപനം ഗ്ലോബല്‍ ഡയറക്ടര്‍ ഫാ. ജിയോ കടവി നേതാക്കള്‍ക്ക് നാരങ്ങാനീര് നല്‍കി അവസാനിപ്പിച്ചു.